***注意*** 此真事含有某情度嘅暴力成份, 但絕無血腥!
案件發生係前晚, 大約11點左右. 正當我全神睇緊雜誌嘅時候, 慘案就不經不覺咁發生咗. 
當然此案必定與這兩姊弟有關. 事源, 依兩姊弟係9點多時已落街小玩片刻. 但意猶未盡回家清潔完後再嚟多個夜場, 互相娛樂. 簡直將屋企變成遊樂場.
你追我跑, 你跳我撞....... 咁樣玩法, 狗到會攰架. 大小姐同二少爺就要飲吓水, 再伏吓嘆吓骨先. 主角終於出場啦~~ 就係煙燻味牛骨一絛. 由於佢有一身體味, 所以一向比白雪雪冇味嘅受歡迎. (狗嘅標準係體味愈強愈受歡迎.......
) 佢係大約個多月前嚟到我屋企, 就咁開始咗不斷被拆磨嘅日子. 但最不幸嘅事情終於發生, 本來尚算完好嘅牛骨慘被解體.
一分為二
絛骨都有成5mm厚架, 但都劫數難逃.
初時仲以為自己眼花, 無啦啦多咗舊骨嘅. 再睇清楚至知依個慘況, 同時亦俾我發現個兇手. 究竟邊個會係真兇呢? 妹豬? 阿低?
疑犯#1 
阿低. 布爹利仔仔. 性格: 非常爛玩跳皮, 古惑, 扮慘. 強項: 賴皮, 蠻力, 口水佬. 咬骨年資: 8個月.
疑犯#2 
妹豬. 布爹利囡囡. 性格: 文靜, 不愛嘈吵, 胆小 . 強項: 為食同瞓覺. 咬骨年資: 兩年以上.
邊個咁暴力而致牛骨難逃魔口, 慘被解體呢? 下集再嚟公開依個真相.
